Ikram Naqvi, (at 7:29AM Saturday 13th of February 2010, GMT)
ham ko miTaa sake ye zamaane me.n dam nahii.n
Jigar Moradabadi
ham ko miTaa sake ye zamaane me.n dam nahii.n
ham se zamaanaa Khud hai zamaane se ham nahii.n
befaayadaa alam nahii.n bekaar Gam nahii.n
taufiiq de Khudaa to ye nemat bhii kam nahii.n
[alam = sorrow; taufiiq = divine strength; nemat = divine blessing]
merii zubaa.N pe shikavaa-e-ahal-e-sitam nahii.n
mujh ko jagaa diyaa yahii ehasaan kam nahii.n
yaa rab! hujuum-e-dard ko de aur vusate.n
daaman to kyaa abhii merii aa.Nkhe.n bhii nam nahii.n
[vusate.n = spread out/expanse]
zaahid kuchh aur ho na ho maiKhaane me.n magar
kyaa kam ye hai ki shikavaa-e-dair-o-haram nahii.n
marg-e-Jigar pe kyo.n terii aa.Nkhe.n hai.n ashk-rez
ik saanihaa sahii magar itanii aham nahii.n
[saanihaa = incident; aham = important]
